Menu

Catalonia : "The final countdown"


Rédigé le Vendredi 9 Octobre 2015 à 18:36 | Lu 98 commentaire(s)

Ci simu. U 27 di sittembre chì vene, i Catalani vutaranu per eleghje i diputati di a Generalitat. S'è a cualizione indipendentista « Junts Pel Sì » hè magiuritaria, s'iniziarà un prucessu di separazione di u Statu Spagnolu. Camparemu forse a nostra prima indipendenza per precura, aspittendu l'ora…


Catalonia : "The final countdown"

Ci simu. U 27 di sittembre chì vene, i Catalani vutaranu per eleghje i diputati di a Generalitat. S'è a cualizione indipendentista « Junts Pel Sì » hè magiuritaria, s'iniziarà un prucessu di separazione di u Statu Spagnolu. Camparemu forse a nostra prima indipendenza per precura, aspittendu l'ora… 

Pep Guardiola o Luis Llach candidati, decine di millaie di sustegni dichjarati, una prisentazione di a lista degna d'un cuncertu di e più grande rock star : voca u sognu catalanu. U 27 di sittembre chì vene, l'elettori saranu chjamati à vutà torna. S'è a cunsulta di l'ottu di nuvembre scorsu ùn hà avutu cunsequenze dirette postu ch'ella ùn era « ufficiale », hà permessu quantunque di mette in ballu l'idea d'elezzione plebiscitarie. Vale à dì chì s'è l'indipendentisti vincenu e prossime elezzione, s'iniziarà u prucessu separatistu subbitu dopu. 

Per falla à l'acorta : a Catalogna pò esse un statu indipendente da quì à pocu s'è i sundami chì danu a cualiziò in testa sò cunfirmati in i scagni di votu. Bisogna ch'ella sia precisata bè a vuluntà di i candidati nanzu à u scrutinu, è ch'ogni elettore sia à capu di i prugetti d'ogni partitu : per o contru l'indipendenza. Un c'hè prublema : a campagna ùn parla chè di què. A lista « Junts Pel Sì » agruppa i rivali di sempre « Convergencia » è « Esquerra », i partiti maiò à prò di l'indipendenza oghje in Spagna, ma dinù partiti cum'è Democrates de Catalunya è Moviment d'Esquerres. Pudemu dinù aghjustà strutture cum'è l'Asamblea Nacional Catalana (ANC), incù i so rapresentanti ch'eranu l'invitati di e Ghjurnate Internaziunale quest'annu torna. Jaume Marfany, vice presidente di l'ANC l'hà detta à u Ribombu : « Anzituttu vulemu vince u vintisette di sittembre. E avemu da vince, hè sicura ! » 

Trimate voi, chì l'ora s'avvicina 

 

I sundami danu a ragiò à u sgiò Jaume. Tutti danu à Junts Pel Si vincidore di l'elezzione di manera larga. E aghjustenduci a « CUP », partitu di strema manca ch'ùn hà vulsutu mettesi in a cualizione ma chì hè à prò di l'indipendenza anch'ellu, è l’ « UDC », partitu indipendentistu anch'ellu di centru chì si prisenta solu (dop'à a spiccanza incù « Convergencia ») i risultati ùn patenu u dibattitu : fora d'un terramottu tremendu, vincerà u catalanisimu u 27 di manera larga. 

E dopu ? Ci vulerà torna à scumbatte incù Madrid. I giurnali cum'è El Pais cuntinueghjanu à mandà a parolla prupagandista di u Statu centrale, prisentendu di novu l'indipendenza cum'è un'idea guasi fascista è mutivata da sintimi negativi. Si lampanu dinù inchieste publiche annant'à l'integrità di i candidati di l'unione, cum'è u presidente attuale di a Generalitat Artur Mas, per scredibilizà l'indipendentisti. Ma e cunsequenze sò poche annant'à a brama maiò di i Catalani d'andassine per u sempre di u reame spagnolu. Per cummincià, anu da realizà i catalani una nova mostra di forza cum'elli e sanu fà, l'11 di sittembre : millioni di militanti sò aspittati in carrughju per stu novu ghjornu di festa naziunale. Empieranu a « meridiana », un'infilata di carrughji longa di parechji chilometri chì sbacca à Barcelona in dui. Una prova torna di a so capacità di mubilisazione è di l'indiatura sputica di l'indipendentisti. 

Sarà a prima tappa di stu mese, nanzu à u 27. Ma ascultendu à Jaume Marfany, ghjè u lindumane chì conta, chì u 27 hè digià vintu. « U 28, principierà a custruzzione di a Republica Catalana ». U travagliu sarà cumplicatu : « Hè certa chì ci saranu assai difficultà. U Statu spagnolu ùn renderà l'affare faciule. Ma s'è no vincimu di modu demucraticu, u prucessu d'indipendenza si farà ». Eccu induve ne simu da l'altru latu di u mare. 

Quì, in Corsica, stu mumentu sarà seguitatu assai. Sperendu ch'ellu ci darà forza è fiatu per cuntinuà a nostra lotta, è ch'elli ci aiutaranu i nostri cugini catalani. Aspittendu, li mandemu tuttu u nostru sustegnu, nanzu di mandalli e nostre felicitazione. Ch'ella campi cent'anni a futura Republica Catalana !

Massimu Poli  




Facebook
Twitter
Dailymotion
YouTube